काठमाडौँ – नेपाली सेनाका बलाधिकृत रथी प्रदीप जंग केसीले कल्याणकारी कार्यलाई आयमूलक र आत्मनिर्भर बनाउनुपर्नेमा जोड दिएका छन्।
रामेछापमा आयोजित ‘भूतपूर्व सैनिक भेटघाट तथा पुनर्मिलन कार्यक्रम’लाई सम्बोधन गर्दै उनले कल्याणकारी कार्यलाई केवल वितरणमुखी मात्र बनाउन नहुने बताएका हुन्।
सैनिक व्यक्ति सेवामा रहँदा मात्र नभई अवकाश पश्चातसमेत समाजमा एक जिम्मेवार, अनुशासित र मर्यादित नागरिकको रूपमा प्रस्तुत हुन आवश्यक रहेको बताए।
उनले सबैलाई स्थानीय स्तरमै उत्पादनशील, सिर्जनशील र उद्यमशील बन्न आग्रह गरे। रथी केसीले राष्ट्रिय एकीकरणको इतिहासदेखि नै सेनाले अतुलनीय योगदान पुर्याउँदै आएको बताए।
उनले वर्तमान र भविष्यका चुनौतीहरूलाई सामना गर्नसक्ने सक्षम संस्थाको रूपमा नेपाली सेनालाई थप विकास गर्दै भावी पुस्तामा हस्तान्तरण गर्नु सबैको साझा दायित्व भएको बताए।
नेपाली सेनाले देशको सार्वभौमिकताको रक्षार्थ वहन गरेको भूमिकाका साथै आन्तरिक सुरक्षा, विकास निर्माण, विपद् व्यवस्थापन तथा अन्तर्राष्ट्रिय शान्ति स्थापना कार्यमा पुर्याएको योगदानले आज सेनालाई स्वदेश र विदेशमा एक विश्वसनीय र सम्मानित संस्थाको रूपमा स्थापित गरेको उनको भनाइ थियो।
केसीले हालै सम्पन्न आम निर्वाचनलाई सुरक्षित र भयरहित वातावरणमा सम्पन्न गराउन सेनाले देखाएको उच्च पेशागत दक्षता, निष्पक्षता र व्यावसायिक चरित्रको समेत प्रशंसा गरे।
