काठमाडौं – नेपाल प्रहरीका महानिरीक्षक (आईजीपी) दानबहादुर कार्कीले विश्वव्यापी शान्ति, सुरक्षा र कानुनको शासनलाई प्रभावकारी बनाउन अन्तर्राष्ट्रिय प्रहरी सहकार्य अपरिहार्य रहेको बताएका छन्।
अमेरिकाको न्यूयोर्कस्थित संयुक्त राष्ट्रसंघ (यूएन) मुख्यालयमा जुलाई ७ देखि जारी पाँचौँ संयुक्त राष्ट्रसंघीय चिफ अफ पुलिस समिट (UNCOPS) लाई सम्बोधन गर्दै आईजीपी कार्कीले साइबर अपराध, मानव बेचबिखन, अन्तरदेशीय संगठित अपराध, आतङ्कवाद, आर्थिक अपराध तथा डिजिटल प्रविधिको दुरुपयोगबाट उत्पन्न चुनौती कुनै एक देशको प्रयासले मात्र समाधान गर्न नसकिने बताए।
यी साझा चुनौतीहरूको प्रभावकारी सामना गर्न सूचना आदान–प्रदान, क्षमता अभिवृद्धि, संयुक्त तालिम तथा आधुनिक प्रविधिको उपयोगमार्फत अन्तर्राष्ट्रिय सहकार्यलाई अझ सुदृढ बनाउनुपर्नेमा उनले जोड दिए।
आईजीपी कार्कीले संयुक्त राष्ट्रसंघीय शान्ति मिसनमा नेपाल प्रहरीले दशकौँदेखि व्यावसायिक, निष्पक्ष र अनुशासित रूपमा जिम्मेवारी निर्वाह गर्दै आएको उल्लेख गर्दै विश्व शान्ति स्थापनाप्रति नेपालको प्रतिबद्धता निरन्तर रहने विश्वास व्यक्त गरे।
उनले नेपाल प्रहरीले महिला प्रहरीको सहभागिता विस्तार, समुदाय–प्रहरी साझेदारी, मानवअधिकारको सम्मान तथा कानुनको शासनलाई प्राथमिकतामा राख्दै आधुनिक र उत्तरदायी प्रहरी सेवाको विकासमा निरन्तर काम गरिरहेको पनि बताए।
सम्बोधनका क्रममा उनले शान्ति र सुरक्षासम्बन्धी साझा चुनौतीहरूको समाधानका लागि सदस्य राष्ट्रहरूबीच विश्वास, समन्वय र साझेदारीलाई अझ बलियो बनाउनुपर्ने आवश्यकता औँल्याउँदै सुरक्षित, न्यायपूर्ण र शान्तिपूर्ण विश्व निर्माणका लागि सबै राष्ट्र एकजुट भएर अघि बढ्न आह्वान गरे।
प्रहरी प्रधान कार्यालयका अनुसार सम्मेलनमा आईजीपी कार्कीले प्रस्तुत गरेको सम्बोधनले अन्तर्राष्ट्रिय मञ्चमा नेपालको सुरक्षा दृष्टिकोण, नेपाल प्रहरीको व्यावसायिक क्षमता र विश्व शान्तिप्रतिको प्रतिबद्धतालाई प्रभावकारी रूपमा उजागर गरेको छ।
